▌用香港車牌換英國車牌

車牌呢樣野，係英國嘅用途多過香港好多。係香港，車牌淨係拎到揸車用，但係英國，車牌係可以當埋身分證明，有張車牌，童顏嘅我哋去超市買酒買刀買18+嘅野 😳，都唔洗一定 show 本護照出黎，拎張車牌就得了～

雖然網上已經有好多人寫過點樣申請香港車牌換英國車牌，但我哋算係遲黎英國個批，發現 DVLA 有啲野已經更新咗，又有啲方法係未見過有人講，所以都想寫一寫，記錄一下。

首先，一定係要去拎一張 D1 申請表啦。呢張表格其實郵局都有得拎，不過個 turnover rate可能無咁高，郵局入面嘅 D1 form 唔擔保係最新版本。我哋就建議一定係上 DVLA 個網站，order 一份表格直接寄去屋企啦（唔洗錢架），保證最新，減少填錯填漏彈回頭嘅機率 😤。

收到申請表之後就可以填表，新款嘅申請表有一 Part 係填 UK Passport Number 或 Share Code。如果係BNO持有人，就可以直接填 BNO Passport Number。如果係特衰護照持有人，就可以上返 Home Office 個網，Generate 一個 Share Code 填落去，咁樣就唔洗好似初代咁，要寄埋本特衰護照去 DVLA 做 ID Check 啦。畢竟，都聽過唔少 Royal Mail 寄失件嘅悲聞，又如果整唔見左本特衰護照，都幾肯定終國領事館唔會幫你搞補發，到時都幾麻煩 🤯！

如果大家有疑惑，都可以上返 DVLA 個網站，依加都寫左，提供左 UK Passport Number 或者 Share Code 就 OK，仲叫大家千祈唔好寄 Physical Identify Document 俾佢添呀 😂

新版本嘅 Part A 係咁樣架～所以話拎新 Version 最好！

填好表，貼埋相，簽埋名之後（記得唔好簽出界，個簽名會拎黎貼係你第時張車牌到，簽出左界會彈回頭簽過架！），如果大家已經申請左英國嘅 High Street Bank Account，例如 Barclays / Llodys 呢啲銀行咁，就可以申請一本支票簿，等佢寄黎屋企。收到之後寫一張俾 DVLA 嘅 £43 支票，連埋填好嘅 D1 申請表就可以去 Post Office 寄信啦。

如果等唔切支票簿，可以試下去銀行寫一張 Banker Draft，即係銀行幫你出嘅支票，用呢張去俾 £43 嘅申請費用，香港出 Banker Draft 好似要收費，不過英國銀行唔洗，大家有需要都可以去 Check 下。如果仲未申請到銀行戶口，又等唔切嘅話，最後亦係最常見，但都係最呃錢嘅方法就係去 Post Office 寄件個陣，買一張 £43 嘅 Postal Order，但 Post Office 需要收取面值嘅 12.5% 手續費，計返都 £5.3 架 😱！如非必要，我建議都係等有 Bank Account 先搞啦。

Banker Draft 無寫 From 邊個 Account，會係銀行幫你出，係你戶口到扣錢咁

萬事俱備之後，就可以出發去 Post Office 吹個東風，我自己就用最高級別嘅掛號去寄嘅，呢隻掛號係連埋回郵掛號，即係 DVLA 處理完你嘅申請寄張新車牌俾你個陣，都係會以掛號形式寄俾你。始終我張香港車牌係入面，萬一唔見左，就要返香港先補領到，又，新車牌若果寄失，咁搞一大餐都無意思啦。呢啲錢就唔慳得啦。

寄好信之後就係等。得閒無野做可以去呢個網址望下佢處理到幾時嘅申請。不過我估計，無返兩三個月我張英國牌都唔會到手架啦。（笑）

▌Day 00｜落機當日

今日係我黎到英國既第五日。終於叫做有啲時間可以回顧下呢五日入面發生過既事，做過既野。

由於臨出發之前，英航取消左我班機，結果我地要臨急臨忘去買 CX 既機票。唔知係因為直飛曼城比較少人，定係我買個陣大家未開始搶飛，最終我以每人 $3800 左右既價錢買到兩張 HKG → MAN 嘅單程機票。

呢個價錢已經包左每人 45 KG 嘅行李（最多兩件，加埋唔過 45 KG 就可以），揀位，同埋兩餐飛機餐。圍返條數仲抵過搭英航，而且唔洗轉機。可惜佢係因航，唔係我都會俾個 Like 佢。

抵達曼城機場，落機排隊去廁所先，去到排隊入境，我地幾乎係排隊尾了，但其實成程機既人都唔多，根本都無坐滿，驟眼睇入境既 Other Passport 人士都只係 20 ～ 30 人，一 Group 一 Group 咁去入境，15分鐘左右就到我地了。仲快過以前去日本旅行排隊入境 😂

因航會係曼城機場 T2 出黎，本身睇左 T1 有的士搭，不過行左出黎就見到 T2 都有的士站，就唔行咁遠，直接上車算。因為曼城機場借行李手推車要俾 £1 仲要係無得退架！拖住 3 個大喼 2 個細喼嘅我地，決定直接上的士算。

呢啲 Black Cap 個內籠極大，咁多行李擺哂入去都無問題 👍

睇返天氣報告，我地落機之前個幾日係超凍而且又落雪，但我地落機個日就好好天！不過好天都無用呀，我地要居家隔離直至 PCR Test 有陰性結果先可以出得街街。出發之前已經預訂好嘅 PCR Test，係中午 12 點幾 1 點嘅時候就經 DPD 送咗黎屋企了，即刻做埋個 Test，拎埋去 Priority Postbox 到寄返去 Lab，然後就係等。結。果。！

我地用個間叫 Testing For All 嘅公司，揀佢只係貪佢平，同埋有谷友都有用過，但原來佢個 Test Kit 得一支棒棒，掃完喉嚨又叫我用返同一支隊入鼻窿到撩⋯⋯ 諗起都嘔心 LOL 

叫我 Use the same swab 喎 ⋯⋯

如果我一早知佢得一支棒棒，我可能唔會揀呢間，不過個陣又係兵慌馬亂嘅時期，因為臨出發前英國政府更新左入境要求，唔可以再用快速測試，而我其實飛前一星期已經訂左快速測試嘅 Test Kit，突然之間變左要搞 Refund 同買過第二款，連 Research 都無再做，直接係返同一間買就算了。

不過結果黎睇都 OK 嘅，都叫做無驚無險，安全到達，可以慢慢進入適應階段了。